Psa 39 | WNC | STEP | Na nina anzingu gwa yakum. Na sanga kuupbam tasiwitdenu katak kayuwit. Ninane genaneta gutonga wamu dua yawit. Ngan, wai aminu nae wesim yuwanu na wamu takngatu dua yawit.

Psalms 39

Devitda kau aaknga matakut.

1 Na nina anzingu gwa yakum.
Na sanga kuupbam tasiwitdenu katak kayuwit.
Ninane genaneta gutonga wamu dua yawit.
Ngan, wai aminu nae wesim yuwanu na wamu takngatu dua yawit.
2 Unzingge na gena asumukum. Umuke wamu takngatu dua yakum.
Siwan nata wamu sanga takeakngae kuut dua yakum.
Siwan ngana musip maatangu meya aknga buyambam siknga sikut.
3 Siwan musip maatang nangayakan natapbum.
Nina atnataawakan musip maatang wai siknga sikut.
Unzing siwan na gena umutnanga dua. Aho, wamu kundu ayakum.
4 Nata Anutu anzing inikwaikum, Buyambam tapa, na kayuk yuwitdane nakanu datdasing yuaing?
Na zaapduknga kupit? Asikaya natane kayuk yutnanga akngana dapaknga ba?
Gata naniwi natapit, ngang inikum.
5 Gata tasiwi nata tapduu dapaknga siknga yuke akupit. Sike tapduu nata kayuk yuwit taknga gae kaine sanga moo binga singgak.
Aminu kuupbam kayuk yuaing kaknga kawi got taknga binga singgak.
Unzing, aminu tapatuta waunga genaneta puyapan kuke wena singgak binga.
6 Aminu kuupbam gunzit siwan katapdane wee kepdakane kaamang binga.
Sike waaminu puyambam pasike sanga kwaapzang pakaing. Siwan ngana puyambamu pasikaingu buyana wena singgak.
Sike aminbamda sangabam pandakngake unekan peaing. Siwan ngana akupanu sanga wa maminda papik?
7 Siwan ngana Buyambam tapa, na apmanu sanga mina bingae kayuat? Wena.
Na baniu gae sike gata gatangamiakgekan yuat.
8 Gata na gatuka take waiakngana kuupbam sandekngamuyo.
Sike gata yamandotdong tasikaing aminu dua kapewi na sapdut wamu naniwam.
9 Siwan ngana na wamu dua yawit.
Na gena asiknga umumbit. Dasingge, gika siknga meya aknga nae namukyak.
10 Sike na gatuka ma tasiwi maiwam.
Gata meya unzing nami na paa kumbum.
11 Aminu wai tasikaingge gata kaanga yanike meya yake ayamunggayak.
Siwan gata sangasanga kwaapzangge take nataaingu gata apasiwi sopukaing.
Unzing gwakgwakga tauk san napan wai singgak binga. Siakan siknga. Aminu kuupbamu waung kaknga genaneta puyapan akokunggak binga sikaing.
12 Buyambam tapa, natane tumuk wamae natapso.
Na gata gatangamiyakge natake gae ganiwa maak gwaang pangamuyo.
Sike nata gae ganiwawa maakga ma umumbim.
Ga atnataayak. Na keu andakane gaat tapduu opak siknga yuamak ngana na aminu maa tapatu binga yuke kungapunggat.
Sike na bapunata yuking binga. Iaya keu andakane tapduu dapaknga sikngakan yuking.
13 Nae meya kumzang ma namim. Gata na atnandutewi musip gwaangu gatu natapit.
Siwana na gatukande masande kungwake keu andaka gatukande tewit.